Uphawu lwe-2010 Transfrontier Conservation Areas (TFCAs) lutyhilwe ngamazwe alithoba akuMazantsi e-Afrika kwiTourism Indaba 2008 ngelinge lokukhuthaza ukhenketho kula mazwe.
I-Angola, iBotswana, iLesotho, iMozambique, iNamibia, uMzantsi Afrika, iSwaziland, iZambia kunye neZimbabwe ngoMgqibelo ngazwinye zibonise inkxaso yazo kwi-brand “Boundless Southern Africa”.
Ngethuba esenza intetho yakhe, uSekela Mphathiswa weMicimbi yokusiNgqongileyo noKhenketho uRejoice Mabudafhasi uthe injongo yophawu olubizwa ngokuba yi-'Boundless Southern Africa' yayikukuba ibe luphawu lokwenene lwaseMzantsi Afrika apho la mazwe alithoba emanyene ngokuthanda indalo, inkcubeko noluntu.
"Isazisi sommandla kunye nomlingiswa ochaza olu phawu lunye ngokupheleleyo kukuhlonela ubunzulu bobunyani belifa lenkcubeko yethu kunye nendalo, kunye nendima yalo echazayo kubomi bethu njengoluntu."
Uphuhliso lophawu oludibeneyo lusekelwe kwimpembelelo yokusingatha iNdebe yeHlabathi yeFIFA yowama-2010 eMzantsi Afrika ukuba ukusingatha indebe yehlabathi akuyi kuxhamlisa uMzantsi Afrika kuphela kodwa ummandla wonke woMbutho woPhuhliso lwaMazwe aseMazantsi e-Afrika (i-SADC).
UNksz Mabudafhasi uthe indebe yehlabathi iza kuza noluhlu lwamathuba oshishino, utyalo-mali nawokhenketho kummandla wethu nakwilizwekazi laseAfrika ngokubanzi.
“Sinethuba apha lokubumba inkangeleko yoMzantsi Afrika ngendlela esinokuthi singaphinde sibe nayo.
“Kubalulekile ke ngoko ukuba ummandla kunye nelizwekazi ngokubanzi liqulunqe kwaye liphumeze izicwangciso eziya kunceda ukufezekiswa kwala mathuba,” wongeze watsho.
Kwintlanganiso yaBaphathiswa boKhenketho abasuka kumazwe angamalungu e-SADC eyayibanjwe ngoJuni ka-2005 eRhawutini, bonke abaphathiswa bazibophelele ngokuhlangeneyo ukwandisa amandla okhenketho kulo mmandla.
Ngaloo nyaka amazwe alithoba akuMazantsi e-Afrika avuma isicwangciso-qhinga esijolise ekuboniseni ii-TFCA ezisixhenxe ezifumaneka kumazwe awo.
Injongo yeQhinga loPhuhliso lwe-TFCA lowama-2010 nokuNgaphaya kukwandisa amandla okhenketho kuMazantsi e-Afrika ngokuhlanganisa intengiso, uphuhliso lweziseko ezingundoqo kunye neenzame zokukhuthaza utyalo-mali lwamanyathelo akhoyo olondolozo olunqamlezileyo.
Amathuba athiwe thaca yindebe yehlabathi kushishino lwezokhenketho, aquka ukwanda kwabakhenkethi abafikayo kwakunye nokwanda kokugxila kumajelo eendaba ukubhengeza nokuthengisa lo mmandla njengendawo ethandwayo yabakhenkethi kunye nokujongana nemingeni engundoqo yokunikezela ngamava.
“Amava okhenketho awodwa abonelelwa ngulo mmandla ngokuqinisekileyo asenza sahluke kwihlabathi liphela.
“Sikulungele ukwamkela ihlabathi kummandla wethu. Uluhlu lwemveliso yethu alunakuphikiswa kwaye ukubalula nje ezimbalwa, lubandakanya iipaki zelizwe ezidumileyo, iVictoria Falls, Ukahlamba-Drakensberg, i-Okavango Delta, iFish River Canyon, iintlango kunye nemilambo, zonke zingaphakathi kweTFCAs,” utshilo uNksz Mabudafhasi.
allafrica.com
